Culleredo desprega unha programación de Nadal con propostas en todas as parroquias
O Concello de Culleredo fixo pública a programación completa para celebrar o Nadal cun calendario cheo de plans dirixidos a públicos de todas as idades. O paquete inclúe visitas e animación infantil nos centros sociais, eventos culturais, iniciativas solidarias, campañas de dinamización comercial e unha forte presenza do deporte como punto de partida destas datas.
O alcalde, José Ramón Rioboo, sinalou que se trata dunha programación pensada para que 'todas as veciñas e veciños, independentemente da súa idade' poidan gozar das festas, co obxectivo de reforzar a convivencia e a participación e, ao mesmo tempo, apoiar o comercio local. O rexedor destacou tamén a aposta por un Nadal 'próximo, solidario e cheo de actividade' en todo o municipio.
A axenda arrinca cun bloque deportivo. O domingo 21 de decembro celebrarase o XII Trail e Andaina de Orientación Gallaecia Raid en Ledoño, organizado polo club Gallaecia Raid. Entre o 22 e o 27 de decembro desenvolverase un campus de patinaxe no Polideportivo Ría do Burgo, impulsado polo Club Aura, mentres que o Sport Sala Culleredo FS porá en marcha un campus de fútbol e fútbol sala no Polideportivo de Tarrío do 22 de decembro ao 2 de xaneiro.
O 22 de decembro comeza tamén o campamento municipal de Nadal, baixo o título 'A misión da garda do Nadal', que se prolongará ata o 7 de xaneiro no CEIP Vila de Rutis. En paralelo, continúa a campaña solidaria 'Un agasallo, mil ilusións', promovida xunto á ONG Reyes Magos de Verdad e Coruña The Style Outlets, coa finalidade de que ningún neno ou nena do concello quede sen xoguete. As inscricións permanecen abertas ata o 22 de decembro. Pola súa banda, a área de Xuventude puxo en marcha o concurso Advento CIPAX, que volverá repartir premios entre os mellores traballos presentados.
No eido cultural e de animación, desde o 19 de decembro haberá ambiente de Nadal nas rúas, con pasarrúas e personaxes que percorrerán as zonas comerciais. Ese mesmo día celebrarase a Festa de Nadal para as persoas maiores no Polideportivo Ría do Burgo, desde as 17.00 horas, coa actuación da coral Voces Veteranas. Tamén o 19 de decembro terá lugar o concerto de Nadal do Conservatorio Municipal de Música, ás 18.00 horas, no auditorio do propio conservatorio.
Ademais, a explanada do Paseo Marítimo do Burgo acolle desde comezos de mes o Winter Park e o Winter Circus, dúas citas xa consolidadas que poderán visitarse ata o 11 de xaneiro.
As visitas de Papá Noel aos centros sociais comezarán o 19 de decembro con animación infantil: ese día estará en Fonteculler de 18.00 a 20.00 horas; o 20 de decembro visitará Almeiras, Orro e Sésamo no mesmo horario; e o 21 de decembro acudirá a Sueiro, Ledoño, Castro Laxe e Castelo, tamén de 18.00 a 20.00 horas. O Apalpador terá a súa cita o 20 de decembro en Celas, de 18.30 a 20.30 horas, acompañado de actividades para a rapazada.
O 20 de decembro celebrarase, así mesmo, a gala e pase de Nadal de Teatro El Ruiseñor, con dúas sesións no Auditorio do Conservatorio: ás 18.00 e ás 20.30 horas.
Xa en xaneiro, as carpas de Nadal volverán ser un dos reclamos centrais con xogos, inchables e obradoiros na praza Europa e en Vila Melania os días 2, 3, 4 e 5 de xaneiro, entre as 17.00 e as 20.00 horas. A tradicional cabalgata dos Reis Magos celebrarase o 5 de xaneiro, con saída desde a avenida Juan Carlos I a partir das 17.00 horas, percorrendo varias parroquias e rematando na praza Europa. Despois terá lugar a recepción das súas Maxestades en Vila Melania e na propia praza Europa.
O mesmo 5 de xaneiro, os Reis Magos tamén visitarán os centros sociais: ás 17.00 horas en O Noso Lar (con animación desde as 16.30), ás 17.45 en Orro, ás 18.10 en Ledoño, ás 18.45 en Sueiro, ás 19.20 en Sésamo, ás 20.00 en Castelo e ás 20.30 en Celas (con animación desde as 18.30).
Durante estas semanas, Culleredo mantén tamén as campañas de promoción do comercio, como Rasca e Gaña, con premios directos por mercar nos establecementos adheridos, e os concursos de decoración e ambientación, entre eles o II Concurso de Ambientación de Nadal na hostalaría local e o VI Concurso de Escaparatismo de Nadal.