Culleredo convértese no epicentro da música e da cultura galega coa celebración do Outubro Folk
Culleredo viviu esta fin de semana unha auténtica festa da cultura popular galega coa celebración do Outubro Folk, que se desenvolveu na explanada do Paseo Marítimo do Burgo o venres 24 e o sábado 25 de outubro. O encontro, organizado pola Agrupación Folclórica Ancoradoira coa colaboración do Concello de Culleredo, conseguiu reunir numeroso público arredor da música tradicional, do baile e das tradicións que forman parte da identidade do país.
A programación abriu o venres coa rodada de cantos de taberna, que levou a foliada polos 16 establecementos participantes do Burgo, enchendo os bares de música en directo e ambiente festivo. A xornada rematou cunha foliada libre na explanada do Paseo Marítimo, un encontro aberto no que músicos e afeccionados se sumaron espontaneamente á festa, prolongando a noite a ritmo de pandeireta, gaita e percusión.
O sábado 25 a actividade arrincou xa ao mediodía cun festival infantil no que participaron Os Rueiriños, a Agrupación Cultural La Madreña e a propia Ancoradoira, visibilizando o relevo xeracional da música e baile tradicional. Despois das actuacións celebrouse un xantar popular cunha gran paella, que serviu de punto de encontro veciñal e de preludio a unha tarde cargada de música enmarcada no CullerFolk, coa presenza de Xilbatuxeiras, Amigos da Gaita, Aire e Pau, As Raiñas ao lado de… e Ancoradoira.
A festa continuou ás 19:00 horas cun pasarúas polo Burgo, que desembocou no Festival Folclórico do 35º aniversario de Ancoradoira, unha cita moi especial na que tamén actuaron os grupos Meigas e Trasgos e a Asociación Cultural La Madreña. O programa pechouse cunha nova foliada aberta, repetindo a fórmula participativa que caracterizou todo o Outubro Folk e que converteu a música tradicional nun espazo común entre artistas e público.
Ademais da parte musical, o Outubro Folk tivo tamén unha vertente social e económica. Durante todo o sábado houbo sorteos e iniciativas en colaboración co comercio local, co obxectivo de dinamizar a zona e reforzar o vínculo entre a cultura de base e o tecido económico do Burgo. O Concello destacou que eventos deste tipo apostan polo espazo público como lugar de encontro e axudan a proxectar Culleredo como referencia cultural na área metropolitana da Coruña.
O goberno local e Ancoradoira puxeron en valor que o Outubro Folk combina tradición e participación cidadá: música en directo ao pé da rúa, impulso ao folclore desde a infancia e ocupación activa do paseo marítimo como escenario cultural ao aire libre. Con este formato, Culleredo consolida unha programación que mestura memoria, identidade e dinamización social en clave comunitaria.