Culleredo celebra este sábado a sexta edición do Cullerciencia
![Imaxe da presentación do Cullerciencia](https://acorunaxa.com/wp-content/uploads/2024/06/Imaxe-da-presentacion-do-Cullerciencia.jpg)
O Concello de Culleredo e o CEIP Ría do Burgo presentaron hoxe a sexta edición de Cullereciencia, unha feira xa consolidada en Galicia e que reúne cada ano máis participación.
A cita científica será este sábado, 8 de xuño, de 12.00 a 19.00 horas na chaira do paseo marítimo do Burgo. O alcalde, José Ramón Rioboo, e o responsable da feira e xefe de estudos do centro, Óscar Lamiño, xunto coa primeira tenente de alcalde e concelleira de Educación, Cristina Pardo, foron os encargados de dar a coñecer os detalles desta edición. A cifra de postos alcanza o seu récord, con medio centenar de entidades participantes que mostrarán as súas iniciativas científicas.
Nese incremento, que suma 10 postos máis que o ano pasado, destaca a maior presenza de centros escolares, os grandes protagonistas do evento. Virán de lugares como Culleredo, Oleiros, Cambre, As Pontes, A Coruña, Cerceda, Meis ou Ribeira, e mesmo das Palmas, Madrid, Murcia ou Sevilla.
Ademais, participarán numerosas entidades, como o CETIM de Culleredo, Afundación, o Ceida, Coawa, e varias facultades da UDC. E as asociacións terán os seus espazos, como a Agrupación Astronómica Coruñesa *Ío, Galicia con Exin Castelos, ou a Asociación Xuvenil XenTD100cia, entre outras.
O alcalde felicitou ao Ría do Burgo pola iniciativa impulsada hai 6 anos, e que é o terceiro que se celebra na rúa porque se decidiu abrirse á sociedade, demostrando que foi unha gran idea xa que “é unha cita ineludible que se está a distinguir en Galicia”. Rioboo sinalou que en numerosos foros que visita na súa condición de rexedor ou de deputado provincial cada vez fálase máis de Cullerciencia.
Así mesmo, o primeiro edil resaltou a celebración da feira xunto “a unha ría do Burgo que vén de ser recuperada” polo que “estamos de dobre celebración”. Rioboo anima á cidadanía para achegarse o sábado a Cullerciencia “para quedar asombrados co traballo que realizan especialmente vos estudantes”.
O programa do Cullerciencia
Dentro programa haberá, como adoita ser habitual, charlas de ciencia. Este ano correrán a cargo de María José Servia, investigadora da Facultade de Ciencias da UDC, que falará de especies invasoras; de Eva Cabanelas, doutora en Veterinaria, que tratará a parasitografía; e de Aurora Grandal, doutora en Bioloxía e Palentología, que abordará a presenza de dinosauros en Galicia. Tamén falará o director da Cidade dás TIC, Alfonso Martínez, sobre o proxecto.
O CEIP Ría do Burgo envorcarase para difundir a cita. Haberá retransmisións en streaming e na radio escolar.