Culleredo avanza na dixitalización da administración local con 40 novos postos intelixentes
O Concello de Culleredo continúa apostando pola modernización tecnolóxica coa posta en marcha dun novo proxecto que dotará ao persoal municipal de 40 postos de traballo intelixentes. A iniciativa, financiada con fondos europeos Next Generation dentro do Plan de Recuperación, Transformación e Resiliencia, conta cun orzamento de 67.369,67 euros.
O obxectivo principal é mellorar a conectividade, a seguridade e a eficiencia enerxética das estacións de traballo, mediante a adquisición de novo hardware e software adaptado ás necesidades actuais, incluíndo o teletraballo e a mobilidade dos empregados públicos.
Os novos equipos portátiles estarán acompañados de accesorios que permitirán unha maior flexibilidade nos desprazamentos. Ademais, implementaranse solucións de conexión cifrada con dobre factor de autenticación, seguindo as directrices do Esquema Nacional de Seguridade.
Outro dos puntos destacados do proxecto é a incorporación dunha máquina de escritorio remoto, que facilitará o traballo colaborativo a través dun repositorio común e accesible. O contrato tamén contempla a formación do persoal municipal no manexo das novas ferramentas, cunha serie de sesións que se impartirán nas instalacións do propio Concello.
Desde o Goberno local destacan que esta actuación “forma parte dunha estratexia máis ampla para transformar os servizos públicos desde unha perspectiva dixital, sostible e centrada na cidadanía”.
As empresas interesadas poden presentar as súas propostas, que serán valoradas tanto polo prezo como polas melloras ofrecidas en aspectos técnicos como a memoria RAM, a capacidade do disco duro ou a calidade das pantallas.