Culleredo aproba un modificativo de crédito para investir 7,9 millóns de euros en actuacións urxentes
O Concello de Culleredo vén de aprobar inicialmente no pleno un modificativo de crédito que permitirá mobilizar 7,9 millóns de euros en investimentos cualificados como urxentes, con cargo ao remanente de tesourería municipal. Segundo o executivo local, este montante forma parte dos 17 millóns de euros de aforro acumulado que se queren destinar a actuacións de interese xeral para a veciñanza.
O expediente recolle, por unha banda, un plan de mellora de infraestruturas deportivas por importe de 5 millóns de euros, impulsado polo goberno municipal, e por outra, un conxunto de actuacións en recintos e servizos públicos achegadas polo grupo nacionalista, dotadas con 2,9 millóns. O punto foi apoiado por todos os grupos da corporación, polo que a aprobación inicial se produciu por unanimidade.
No ámbito deportivo, o paquete inclúe a reforma do campo de fútbol do Carrizo en Portádego e a renovación do céspede do campo de Rutis, así como a rehabilitación dos vestiarios do campo do Burgo e dos vestiarios de Tarrío. Prevese tamén a construción de novos vestiarios conxuntos en Almeiras e o reforzo da iluminación no campo e no pavillón desta parroquia e no campo do Burgo, xunto coa substitución de redes e porterías nos distintos campos de fútbol municipais.
Tamén se contempla a rehabilitación integral do polideportivo de Tarrío, a instalación de marcadores electrónicos en campos e pavillóns, a reforma das pistas deportivas do parque de Alvedro e a renovación das pistas de Fonteculler na contorna da avenida Portádego. O modificativo inclúe ademais o peche perimetral das pistas da avenida Xoan Carlos I, a renovación do complexo deportivo de Sésamo, a reforma integral da pista de Los Olivos–Vallesur e a creación dunha nova pista multideporte en Vilaboa, no parque Sofía Casanova, así como actuacións de mellora en cubertas de instalacións deportivas e nos campos de chave do municipio.
Fóra do capítulo estritamente deportivo, o plan recolle a renovación do Conservatorio Municipal e a posta en marcha dunha Área de Rehabilitación Integral na Fonte da Bolsa. Inclúense obras de saneamento en Celas, Castelo, Sueiro e Sésamo, así como actuacións para mellorar a accesibilidade en Vinseira, Orro, Bregua e Celas.
No apartado viario e de espazos públicos, prevese a instalación dun novo parque infantil nas Brañas, o asfaltado da rúa Pomares e o arranxo da rúa Miguesas, ademais da reparación da ponte sobre a vía do tren no Burgo. O expediente incorpora tamén partidas para reparacións menores en fochancas das estradas municipais, para a reposición de baldosas nas beirarrúas e para accións de mantemento nos colexios de Culleredo.
Tras esta aprobación inicial, o modificativo continuará agora a súa tramitación administrativa antes da entrada definitiva en vigor.