Culleredo adxudica 2,45 millóns para cinco actuacións clave de mellora urbana e de servizos
Culleredo impulsa un paquete de obras por 2.454.568,97 euros que darán un salto en seguridade viaria, accesibilidade e eficiencia tanto no casco urbano como no rural. O Concello confirma que os traballos comezarán nas vindeiras semanas tras formalizar os contratos. O alcalde, José Ramón Rioboo, subliña que as intervencións responden ás demandas veciñais e “traduciranse nunha mellor calidade de vida”.
En Vilaboa, completarase a humanización da avenida de Vilaboa no tramo AP-9–Fonte da Balsa por 798.210 €: novo firme e beirarrúas máis amplas, dous pasos sobreelevados, máis arborado e xardinería, prazas PMR, iluminación LED con sensores de presenza nos pasos e renovación semafórica. Tamén en Vilaboa, a praza da Sagrada Familia renovarase de forma integral por 613.962,65 €: plataforma única con máis prazas de estacionamento, pavimento de granito nas áreas peonís e hormigón a 20 km/h na zona compartida, máis verde e novo mobiliario. O parque infantil mudará ao interior, cuberto e con pavimento de caucho e xogos novos.
En Acea de Ama, a esperada reforma da urbanización Tierno Galván adxudícase por 759.054,53 €. O proxecto prioriza o peatón: ampliarase a plataforma onde non hai beirarrúa ou é estreita, creando itinerarios seguros que conecten Avenida de Rutis, Universidade Laboral e paseo fluvial. Haberá arborado, mobiliario novo, mellora de saneamento e pluviais e renovación total do alumeado. Manteranse as prazas de aparcamento e a zona será 30.
No ámbito rural, en Ermida de Ternande (Celas), renovaranse os firmes por 144.295,32 € con nova capa de rodadura, limpeza de bordos, reapertura de cunetas e nova sinalización. E en A Zapateira (Mansosol), o Concello destina 139.046,47 € —cofinanciados polo Plan Único da Deputación— á renovación do alumeado LED con telexestión nas rúas Liberdade, Democracia, Igualdade e Fraternidade para gañar en eficiencia e luminosidade.