Culleredo activa unha app de alerta por posibles agresións sexuais para as festas de Vilaboa e O Burgo
O Concello de Culleredo estreará nas festas patronais de Vilaboa e O Burgo unha nova ferramenta de prevención e resposta fronte a situacións de perigo: a aplicación móbil Código Violeta, deseñada para actuar de forma inmediata ante posibles agresións ou situacións de acoso, especialmente de carácter sexual.
A app incorpora un “botón do pánico” que, ao premelo durante tres segundos, envía automaticamente un aviso co xeoposicionamento ao Posto de Mando Avanzado instalado polo Concello no recinto das festas. Este centro de coordinación —estreado o pasado ano— conta con pantallas para monitorizar en tempo real as cámaras de vixilancia e canalizar as comunicacións entre os distintos corpos de emerxencia.
Unha das funcionalidades máis destacadas da aplicación é a posibilidade de gravar vídeo e audio no momento de activar o aviso de SOS, permitindo así recoller probas do sucedido e identificar ao posible agresor.
A concelleira de Cohesión Social, Marta Figueroa, reuniuse co xefe da Policía Local, José Ramón Couceiro, e con persoal técnico do Centro de Información á Muller (CIM), da área de Festas e da empresa desenvolvedora da aplicación para coordinar a súa posta en marcha. A app estará dispoñible nas vindeiras horas a través da web municipal e das redes sociais.
A ferramenta estará activa nas festas de Vilaboa —do 11 ao 15 de xullo— e nas de O Burgo —do 23 ao 28—, entre as 23.00 e as 03.00 horas, coincidindo co horario de maior afluencia durante as verbenas.
Ademais desta nova medida, o Concello reforzará o dispositivo de seguridade cun operativo especial no que participarán a Policía Local, a Garda Civil, o Servizo Municipal de Emerxencias, Protección Civil e o 061. Tamén se habilitará un Punto Violeta como espazo seguro, atendido por persoal especializado en igualdade, que ofrecerá información, apoio e activará o protocolo correspondente en coordinación coas forzas de seguridade.
“Queremos ofrecer todas as ferramentas posibles de prevención contra a violencia de xénero”, afirmou Figueroa, quen subliñou a utilidade desta iniciativa en contextos multitudinarios como as festas. O obxectivo, segundo o goberno local, é que “as festas sexan espazos de lecer seguros para todas e todos, primando a igualdade e o respecto”.