Culleredo activa un dispositivo especial de seguridade para a primeira edición de O Burgo Fest
O Concello de Culleredo porá en marcha un dispositivo especial de seguridade con motivo do ‘O Burgo Fest’, que se estreará o venres 26 de setembro na explanada do Paseo Marítimo de O Burgo. O obxectivo é garantir unha xornada de lecer ‘segura, accesible e responsable’, segundo indica a Alcaldía.
O operativo estará integrado por efectivos da Policía Local e da Garda Civil, o Servizo Municipal de Emerxencias, Protección Civil e persoal sanitario do 061. Ademais, instalarase un ‘Punto Violeta’ para a atención e acompañamento ante posibles situacións de agresións machistas, reforzando a prevención e a resposta inmediata.
Para facilitar os desprazamentos das persoas con mobilidade reducida, habilitaranse prazas de estacionamento específicas na avenida Juan Carlos I. A organización lembra que o festival comezará ás 20.00 horas e prolongarase até as 03.00 da madrugada, cunha programación musical pensada para todos os públicos.
O alcalde, José Ramón Rioboo, fai un chamamento á responsabilidade individual: ‘Toca gozar da festa, seguir as indicacións dos equipos de seguridade e evitar o alcohol ao volante’.