Culleredo acolle a preestrea do espectáculo 'Alta Costura' para alumnado de secundaria
A compañía de teatro físico Elefante Elegante chega a Culleredo coa súa nova creación, Alta Costura, unha peza que aborda de maneira irónica e poética a industria da "fast fashion" e o seu impacto na sociedade. A obra, dirixida por Gonçalo Guerreiro e con texto de Tiago Alves Costa, conta coas interpretacións de Sofía Espiñeira, Raquel Crespo, Pablo Sánchez e María Torres.
O Edificio de Servizos Múltiples do Burgo será o escenario das primeiras funcións desta peza, que se representará os días 2, 3, 4, 7, 8, 9, 10 e 11 de abril en pases escolares dirixidos ao alumnado de 3º e 4º de secundaria do IES Rego de Trabe e do IES Eduardo Blanco Amor. Estes últimos, ademais, tiveron un papel destacado no proceso de mediación da obra, participando activamente na súa creación.
Con estas funcións escolares, Elefante Elegante pecha a súa residencia artística en Culleredo, municipio coprodutor do espectáculo. A obra conta ademais co apoio do Concello das Pontes e unha subvención da Axencia Galega das Industrias Culturais (AGADIC).
Tras a súa estadía en Culleredo, Alta Costura trasladarase ao Auditorio Cine Alovi das Pontes, onde a compañía realizará unha residencia técnica a partir do 18 de maio. A estrea absoluta da obra para o público xeral terá lugar o sábado 24 de maio, ás 20.00 horas, e as entradas sairán proximamente á venda.
Alta Costura invita a reflexionar sobre os mecanismos de consumo na industria da moda, a súa relación co recoñecemento social, a contaminación e as condicións laborais. Cunha linguaxe visual e de movemento, a peza explora a rapidez coa que a roupa se merca e se descarta, xerando un impacto ambiental significativo. Cun toque de humor, característico da compañía, a obra busca xerar conciencia sobre os hábitos de consumo na sociedade actual.