Cruz Vermella abre o luns o prazo de inscrición nos seus cinco ciclos de FP na Coruña
Cruz Vermella, de forma concertada coa Xunta de Galicia, abrirá este luns 24 de xuño o prazo de solicitude de praza nos seus ciclos de Formación Profesional. De forma telemática e ata o xoves 4 de xullo, as persoas interesadas poden iniciar o seu proceso de matrícula no Ciclo Medio en Atención a Persoas en Situación de Dependencia, o Ciclo Medio en Farmacia e Parafarmacia, o Ciclo Medio en Coidados Auxiliares de Enfermería, o Ciclo Superior en Imaxe para o Diagnóstico e Medicina Nuclear, e o Ciclo Superior en Laboratorio Clínico e Biomédico.
Titulacións referentes no sector sociosanitario
Os 136 estudantes de FP que finalizaron os seus estudos no centro súmanse este ano a un total de 3.380 alumnos e alumnas que desde 1998 optaron por Cruz Vermella para a súa formación no ámbito sociosanitario. “O noso centro consolidouse como unha referencia en materia de formación profesional, ademais da impartición doutros cursos formativos relacionados eminentemente co ámbito sanitario”, explica a directora do Centro de Formación de Cruz Vermella na Coruña, Aránzazu Jiménez de Chairo, que subliña a importancia de “responder desde o ámbito académico e a capacitación profesional á demanda actual do mercado laboral” como premisa fundamental para a inserción laboral do alumnado.
O calendario do proceso de admisión nestes ciclos impartidos por Cruz Vermella comeza coa presentación de solicitudes, que estará aberta desde o 24 de xuño ás 9.00 ata o 4 de xullo ás 13.00 horas. A resolución provisional de solicitudes publicarase o 10 de xullo e sobre a mesma haberá un prazo de reclamacións entre o mesmo 10 de xullo e o 12 de xullo ás 13.00 horas.
As datas para a primeira adxudicación ordinaria e matrícula serán do 17 de xullo ás 9.00 ao 22 de xullo ás 13.00 horas; a segunda adxudicación ordinaria, e matrícula, do 24 de xullo ás 9.00 ao 31 de xullo ás 13.00 horas; e a terceira adxudicación ordinaria e matrícula, do 2 ao 5 de setembro.
A información detallada pode consultarse no seguinte enlace e desde o propio Centro de Formación de Cruz Vermella, chamando ao 981 169 163.