Cruce de acusacións entre o Concello de Culleredo e o PP polo estado de Augas Mansas
O Concello de Culleredo e o grupo municipal do Partido Popular manteñen un tenso enfrontamento a conta da situación da urbanización Augas Mansas, na zona da Zapateira. O Goberno local vén de reprobar as “terxiversacións interesadas” que, segundo denuncian, está levando a cabo o PP co único fin de “promover o ataque ao Goberno local”.
O alcalde, José Ramón Rioboo, asegurou o pasado venres o seu apoio ás reclamacións veciñais, logo dunha reunión co seu representante, e subliñou que xa hai un plan en marcha para dar resposta ás demandas. Con todo, lamenta que “ao PP as solucións non lle interesan en absoluto”.
Desde o executivo local acúsase a un edil popular de ter intentado “fingir que formaba parte do Goberno local para facer crer aos veciños que o alcalde non ía atenderlles”. Segundo indicaron, tanto o xefe da Policía Local como o enxeñeiro municipal de Obras estaban presentes cando se expuxo este comportamento.
Ademais, o Concello informou de que o mesmo concelleiro usou esta estratexia previamente ao atribuírse a reparación dunha tapa da canalización eléctrica. “Inventouse ante os veciños que se solucionara grazas a el porque contactara con Naturgy”, cando en realidade, segundo aclarou o goberno municipal, foi arranxada polo propio Concello a través da empresa de mantemento, “dato que ocultou deliberadamente”.
O goberno de Culleredo considera que estas actuacións son “prácticas infantís” e impropias dunha forza política que aspira a gobernar, movidas pola “ambición política desmedida” da súa portavoz.
O PP acusa ao Goberno de Rioboo de abandonar a veciñanza de Augas Mansas
Pola súa banda, o Partido Popular de Culleredo expresa o seu “total respaldo aos veciños da urbanización Aguas Mansas”, que se mobilizaron recentemente para denunciar o “estado de abandono que sofre a zona desde hai anos por parte do goberno municipal de José Ramón Rioboo”.
O grupo popular lembra que no pleno do pasado mes de marzo se aprobou unha moción de seu autoría que recollía boa parte das demandas veciñais reiteradas na protesta: arranxo de socavóns, renovación de beirarrúas, desbroce de maleza, mellora na recollida do lixo e incremento da seguridade viaria.
Segundo denuncian, “tres meses despois, ningunha desas actuacións foi executada”. “A situación en Aguas Mansas é un exemplo claro de deixadez institucional, xa é insostible”, asegurou a portavoz do PP, Izaskun García, quen acusou ao alcalde de “abandonar aos veciños e desprezar os acordos plenarios que el mesmo votou a favor”.
“Non hai xustificación posible para que, tras unha moción aprobada con amplo respaldo, o goberno local siga sen mover un dedo. Menos escusas e máis acción”, engadiu. García advertiu que o PP manterá a súa reivindicación activa mentres non se atenda ás demandas veciñais: “Compartimos a súa indignación e estaremos ao seu lado en todas as accións que consideren necesarias. É hora de pasar das palabras aos feitos”.