Cortes de tráfico e restricións de aparcamento en Betanzos pola rodaxe dunha serie de Netflix
Betanzos acollerá este xoves a rodaxe dunha serie para Netflix a cargo de Bambú Producciones, o que traerá consigo prohibicións de aparcamento e cortes puntuais de tráfico ao longo da xornada. O Concello solicita colaboración á veciñanza e ás persoas condutoras e pide desculpas polas molestias.
Entre as 8.30 e as 11.30 horas non se permitirá estacionar en ningunha das marxes do treito comprendido entre o Pavillón Municipal José María Valeiro Iglesias e o Centro de Saúde. Nesa franxa horaria poderían producirse afectacións á circulación, con desvíos ou detencións momentáneas para facilitar as tarefas do equipo de filmación.
Ademais, de 10.30 a 15.00 horas estará prohibido o estacionamento na rúa Instituto Francisco Aguiar, na zona do Pasatempo, co obxectivo de reservar espazo técnico e garantir a seguridade do operativo.
Por outra banda, a partir das 15.00 horas a parada de taxi da praza de Galicia quedará trasladada de maneira temporal á praza Irmáns García Naveira, onde se prestará o servizo mentres duren os traballos.
O dispositivo municipal de mobilidade e seguridade estará activo para ordenar os fluxos de tráfico e atender incidencias. Recoméndase planificar con antelación os desprazamentos, empregar alternativas de aparcamento e, se é posible, optar polo transporte público.