Corte temporal no acceso da Grela á Alfonso Molina polo avance das obras na AC-11
A Delegación do Goberno en Galicia informou de que, co motivo das obras de remodelación na Avenida de Alfonso Molina (AC-11), na Coruña, será preciso cortar temporalmente o ramal que conecta a AC-10 (avenida de San Cristóbal) coa AC-11 en sentido saída da cidade, no acceso procedente do polígono da Grela.
O peche é necesario para realizar intervencións nos servizos afectados pola tubaxe de abastecemento de 600 milímetros situada baixo a calzada. Segundo a comunicación oficial, as restricións estarán activas entre o martes 28 de outubro ás 10.00 horas e o xoves 30 ás 13.00 horas. A Delegación xa adianta que máis adiante será preciso repetir cortes puntuais, que se anunciarán previamente.
Durante ese período, recoméndase aos vehículos que saen do polígono da Grela empregar itinerarios alternativos. Para desprazamentos longos, a vía suxerida é a AC-14. Para traxectos curtos ou medios proponse o percorrido pola avenida da Universidade (avenida Glasgow – avenida Universidade – avenida García Sabell) ata a ligazón de Matogrande coa Avenida de Alfonso Molina. Para movementos internos de curto percorrido tamén se poderá usar a glorieta de Matogrande.
As rutas alternativas estarán indicadas mediante paneis de mensaxe variable tanto da DXT como do propio Concello da Coruña, co obxectivo de ordenar o tráfico e minimizar retencións.