Contos, marcapáxinas e vídeos para celebrar as Letras en Bergondo
Bergondo volverá celebrar o Día das Letras Galegas coa fórmula que xa converteu nun clásico da súa programación cultural: concursos para escribir, crear e gravar arredor da literatura galega. O Concello presentou este xoves unha nova edición dos certames 'Bergondo nun conto', de marca-páxinas e de vídeo, dirixidos á veciñanza maior de 3 anos empadroada no municipio ou ao alumnado dos centros educativos locais.
A convocatoria chega ademais cun fío conductor moi definido. A edición de 2026 xirará arredor de Filomena Dato e Alejandro Pérez Lugín, dúas figuras literarias estreitamente vinculadas ao municipio e ás que Bergondo dedica de maneira institucional todo este ano. O goberno local mantén así a súa liña de poñer en valor autores e autoras ligados á historia cultural da localidade.
No XXVII certame literario 'Bergondo nun conto', os participantes poderán presentar relatos ou poesías sobre Filomena Dato, mentres que o XX concurso de marca-páxinas tamén tomará como referencia o Día das Letras Galegas ou a figura da autora. Pola súa banda, o V concurso de vídeo propón pezas audiovisuais nas que se faga mención tanto á celebración das Letras Galegas 2026 como ao ano dedicado a Filomena Dato e Alejandro Pérez Lugín.
O prazo para entregar os traballos permanecerá aberto ata o 6 de maio e as obras poderán presentarse presencialmente na Casa da Cultura ou no edificio da Senra. As persoas gañadoras de cada categoría recibirán un bono de 100 euros para consumir nos establecementos adheridos á campaña 'En Bergondo, mellor'. As bases completas xa están publicadas e o Concello mantén aberta a información a través da área municipal de Cultura.
A convocatoria encaixa no 'Ano Filomena Dato Muruais e Alejandro Pérez Lugín', unha conmemoración coa que Bergondo quere reivindicar dúas voces destacadas da súa memoria literaria. No caso de Filomena Dato, o municipio xa lle rendeu homenaxe este ano no cemiterio de Moruxo, onde descansan os seus restos, dentro dun programa destinado a recuperar e difundir o seu legado.