Conta atrás para a posta en servizo dos novos módulos de descanso para os médicos de garda no CHUAC
A partir do vindeiro luns 24 de febreiro, a Xunta de Galicia poñerá en servizo os novos módulos de descanso para os médicos de garda, unha medida que ten como obxectivo facilitar o avance das obras do Novo Complexo Hospitalario Universitario da Coruña. Así o anunciou o conselleiro de Sanidade, Antonio Gómez Caamaño, durante a súa visita ao hospital da cidade herculina.
O conselleiro, acompañado pola delegada territorial da Xunta, Belén do Campo, e polo xerente da área sanitaria, Luis Verde, detallou que en total se instalarán 50 módulos: 27 dobres e 23 individuais, que ofrecerán prazas para un total de 77 médicos de garda. Tamén se habilitará un módulo de control que estará custodiado por un garda durante as 24 horas do día para garantir a total seguridade do persoal sanitario.
Estes módulos, que se ofrecerán como espazo de descanso, estarán equipados con ordenadores conectados á rede para que os médicos poidan realizar todas as tarefas asistenciais que non requiran presenza física. Deste xeito, as novas instalacións, que substitúen o espazo temporal no hotel de pacientes, garantiran un lugar cómodo e funcional para os profesionais.
O conselleiro agradeceu a colaboración de todos os profesionais que se están a ver obrigados a adaptar os seus hábitos laborais debido á construción do Novo Hospital Público da Coruña, tanto os médicos de garda como o persoal que se desprazou a EXPOCoruña para continuar coas súas funcións.
UNIDADE DE LESIONADOS MEDULARES
Ademais, Gómez Caamaño aproveitou a súa visita para comprobar de primeira man o traballo realizado na Unidade de Lesionados Medulares do hospital, que destacou como un exemplo de excelencia asistencial. O conselleiro subliñou a grande implicación dos profesionais desta unidade, converténdoa nun referente para toda Galicia e parte de España.
Durante o ano pasado, esta unidade atendeu 141 ingresos e máis de 3.000 consultas, tanto médicas como de enfermería. A unidade tamén implementou un servizo de videoconsulta que, durante o 2024, evitou o desprazamento de 87 pacientes ata o hospital.
Ademais, Gómez Caamaño resaltou a aposta pola innovación tecnolóxica, como a incorporación de equipos robotizados que supuxeron un investimento de máis de 770.000 euros por parte da Xunta, mellorando a precisión e eficacia da rehabilitación. Tamén destacou a posta en marcha dun plan de humanización na atención aos lesionados medulares, que promove unha atención máis sensible e próxima aos pacientes.