Conferencia de balde no Círculo de Artesáns sobre a orixe das tradicións galegas
O Círculo de Artesáns da Coruña (San Andrés, 36) acolle este xoves 30 de outubro, ás 19.00 h, a conferencia 'Tempo de Ánimas', unha cita aberta e gratuíta na que a antropóloga Lidia Mariño Ventoso explicará as orixes e o significado real das tradicións galegas asociadas ao Samaín, Halloween e o Día de Defuntos.
Mariño Ventoso, antropóloga social e cultural pola UNED e divulgadora en televisión, radio e redes, abordará cun enfoque ameno prácticas como os colares de castañas, o tallado de cabazas ou a lenda da Santa Compaña, situándoas na cosmovisión pagá anterior ao cristianismo, baseada na reencarnación das almas e na idea de que todo canto nos rodea ten ánima.
O acto está promovido pola Asociación Vivir para Ben Morrer, que procura divulgar unha mirada ampla sobre a morte e a necesidade de abordala con naturalidade. A entrada é libre ata completar capacidade.