Coñecemos a asociación Arela Cambre: unha resposta comunitaria ás necesidades da diversidade funcional
Por Amanda Fernández
En Cambre, a Asociación Arela leva case dúas décadas traballando arreo por e para as persoas con diversidade funcional. Falamos con Concepción Ageitos Santos, tesoureira da entidade, quen nos achega á realidade desta asociación: os seus inicios, os retos actuais, a resposta da veciñanza e a importancia de seguir creando espazos accesibles e inclusivos para todos e todas.
Cando e como naceu a Asociación Arela Cambre?
Arela naceu no ano 2007 como reposta as inquedanzas dunhas poucas familias de nenos e nenas con diversidade funcional, nese momento aínda pequenos, e que necesitaban terapias diversas como logopedia, terapia ocupacional ou fisioterapia neurolóxica.
Cal é o principal obxectivo ou misión da asociación hoxe en día?
Hoxe en día os nosos usuarios abranguen distintas idades e diferentes diagnósticos, polo que intentamos suplir e cubrir as súas necesidades na medida do posible.
"Séguese a necesitar máis información, divulgación e visibilidade de pequenas asociacións coma a nosa"
Que tipo de actividades desenvolvedes ao longo do ano e cales son as máis destacadas nesta época de verán?
Ao longo do ano as actividades que desenvolvemos son terapias individuais de logopedia, terapia ocupacional e fisioterapia neurolóxica.
En época de verán solemos ter un campamento urbano de 9.30 a 16.30 horas para axudar á conciliación familiar cando os centros de día pechan as súas portas. Este mes pasado comezamos unha actividade nova, ioga adaptada, que está a ter unha gran acollida.
Como valorades a acollida e participación da comunidade de Cambre nas dinámicas e actividades que desenvolve a asociación?
A xente participa as veces de diferentes maneiras, hai quen fai unha aportación económica como socios colaboradores; que o fai colaborando como voluntario nalgunhas das nosas actividades; e quen o fai tomando parte en elas, como no caso do ioga adaptado.
Séguese a necesitar máis información, divulgación e visibilidade de pequenas asociacións coma a nosa.
Que tipo de apoio institucional ou colaboración tedes actualmente?
Actualmente contamos co apoio e colaboración da Deputación da Coruña, coa Xunta de Galicia, co Concello de Cambre e con Caixabank Cambre.
"Para nós é un orgullo loitar día a día por seguir facendo esas terapias tan necesarias para os nosos usuarios"
Cales son os principais retos que enfrontades a curto e medio prazo como entidade?
Aínda que poda soar un pouco prosaico, o principal retos sempre é a posibilidade de lograr financiamento para o mantemento das nosas actividades. En case todas as actividades hai unha parte que paga o usuario e outra que subvenciona a asociación.
Que mitos considerades que seguen imperando arredor da diversidade funcional?
Hai moitas persoas que aínda non saben o que significa a diversidade funcional, aínda a día de hoxe, en pleno século XXI prefiren afastarse e mirar cara a outro lado. Cada vez máis persoas con diversidade funcional están a entrar en tódolos ámbitos da nosa sociedade, dende o laboral, cultural, musical…
Que significa para vós formar parte de Arela Cambre e que mensaxe vos gustaría transmitir á sociedade?
Moitas das persoas que formamos Arela somos socios fundadores, outras foron chegando co tempo. Para nós é un orgullo loitar día a día por seguir facendo esas terapias tan necesarias para os nosos usuarios, cubrir cos campamentos a necesidade de conciliación familiar e de cando en vez facer algunha actividade illada como terapia con animais, musicoterapia, terapia psicolóxica ás familias e algunha outra que seguro agora mesmo deixo no tinteiro.