Conan e Stoned Jesus encabezarán un Fumega Fest que xa reparte o seu cartel por xornadas
O Fumega Fest xa puxo orde ao seu cartel de 2026. O festival, centrado no stoner rock, o doom metal e outros sons pesados da escena alternativa, vén de anunciar a distribución por días da súa segunda edición, prevista para o 26 e o 27 de xuño no Parque do Pasatempo de Betanzos. Coa nova actualización, a cita dá un paso máis na súa conta atrás cara ao verán e abre tamén a venda de entradas de día.
A primeira xornada, a do venres 26, estará encabezada polos británicos Conan e polos suecos Burst. Nese mesmo día tamén actuarán Men Eater, Luciférnaga e Travo, nun arranque que reforza a vertente máis dura do festival.
O sábado 27 será a quenda de Stoned Jesus e Causa Sui, dous dos grandes reclamos desta edición. Completan a segunda xornada Wet Cactus, Volcanova e Moura, cunha combinación de nomes internacionais e propostas máis próximas que remata de darlle forma ao cartel definitivo por días.
A organización ten xa activadas as entradas para xornadas soltas, unha opción que se suma aos abonos xerais para unha edición que volverá desenvolverse no recinto do Pasatempo. Na web oficial do festival tamén figura a opción de acampada, situada a uns 500 metros da entrada e con acceso para os dous días do evento.
Tras a súa estrea o pasado verán, o Fumega Fest afronta agora a súa segunda edición cun cartel que volve apostar por nomes destacados do circuíto europeo e por consolidar en Betanzos unha cita especializada dentro da programación musical de Galicia.