Comezan as prospeccións no xacemento de Castrillón para avaliar restos arqueolóxicos
Comezaron os traballos de prospección no denominado xacemento de Castrillón, no barrio coruñés de Oza-Castrillón, co obxectivo de comprobar a existencia de restos arqueolóxicos na zona. O operativo, autorizado pola Dirección Xeral de Patrimonio Cultural da Xunta de Galicia e contratado pola Xunta de Compensación Parque de Oza, está dirixido polo arqueólogo Emilio Ramil González, quen xunto ao seu equipo, avaliará a extensión e interese dos restos encontrados para garantir a súa protección e integración no futuro desenvolvemento urbanístico da área.
Durante os próximos días, concretamente durante os dez días que durarán os traballos, abriranse sete unidades de sondaxe arqueolóxica. Cabe recordar que foi en 2014 cando, durante a apertura das rúas Casanova de Eirís e Avenida da Concordia, se descubriron restos de estruturas habitacionais, como ocos que podían indicar a posible ubicación de postes de madeira, xunto a outros materiais arqueolóxicos. Este achado levou á inclusión do xacemento no Plan Básico Autonómico.
O futuro desenvolvemento urbanístico na zona, impulsado pola Xunta de Compensación Parque de Oza, reserva unha ampla área como zona verde ao redor do xacemento, que poderá ampliarse dependendo dos resultados dos achados.
INFORMACIÓN AOS VECIÑOS
A Xunta de Compensación Parque de Oza, composta polas entidades propietarias da parcela onde se desenvolven as prospeccións (Fundación Juana de Vega e Sareb), colgou un cartel informativo na área afectada hai un mes, anunciando o inicio das sondaxes. Ademais, enviaron unha nota informativa co plano das actuacións ao centro social de Castrillón, co fin de alertar aos veciños que estaban utilizando de maneira precaria parte da leira para sementar, instándoos a retirarse antes do inicio das obras.
A Xunta de Compensación fai un novo chamamento á colaboración dos veciños, solicitando a retirada urxente de peches, plásticos e outros materiais instalados na zona para completar o estudo arqueolóxico de maneira adecuada.
Os propietarios do solo e dereitos edificatorios que integran a Xunta de Compensación agardan agora que o Concello aprobe o convenio que permitirá o desenvolvemento do plan especial, que dará paso á urbanización e edificación de toda a zona. A Xunta lembra que hai xa dúas décadas cederon ao barrio miles de metros cadrados para permitir a apertura das rúas Casanova de Eirís, Concordia e Antonio Ríos, o desenvolvemento do Parque de Oza e a construcción de equipamentos públicos, como a piscina municipal, que actualmente benefician a todos os veciños da área.