Comezan as negociacións dos Orzamentos Municipais de 2025 na Coruña, para dar resposta ás necesidades dos coruñeses
O Palacio Municipal de María Pita acolleu esta mañá a primeira reunión para a negociación dos Orzamentos Municipais de cara ao vindeiro ano 2025, na que participaron unha representación do Goberno municipal e o equipo designado polo BNG.
A delegación do executivo local estivo encabezada polo concelleiro de Economía e Planificación Estratéxica, José Manuel Lage, e a concelleira de Benestar Social, Participación e Igualdade, Nereida Canosa. Pola parte do BNG, participaron o voceiro nacionalista, Francisco Jorquera, xunto cos concelleiros Avia Veira e David Soto.
Pola súa banda, José Manuel Lage destacou que esta reunión representa o primeiro paso cara á aprobación dos novos orzamentos, subliñando a intención do Goberno de crear un orzamento "tan ambicioso como o de 2024". O portavoz municipal tamén reafirmou o compromiso de seguir traballando para atender as necesidades dos barrios e da cidadanía coruñesa.
Porén, Francisco Jorquera, portavoz do BNG, puntualizou que, a pesar de ser unha “reunión formal”, a verdadeira negociación dos orzamentos aínda non comezou. "Non se iniciará até que se cumpran os compromisos contidos no Acordo de Investidura e no acordo que deu luz verde aos orzamentos de 2024", explicou Jorquera.
No Acordo de Investidura figuraba que a negociación dos orzamentos comezaría en setembro e que na primeira reunión co BNG o Goberno Local debía entregar un borrador das contas para o próximo exercicio. "Mais esa entrega non se produciu. Non temos ningún borrador. O que fixeron foi comentarnos as grandes liñas que, ao seu xuízo, deberían contemplar os vindeiros orzamentos, pero iso non é suficiente", afirmou.
Ademais, Jorquera sinalou que o Goberno non ten proporcionado a información detallada sobre o grao de execución dos orzamentos vixentes, especialmente en relación aos investimentos e programas introducidos a proposta do BNG. Esta información é crucial para avanzar nas negociacións, xa que "calquera acordo orzamentario debe partir dunha base sólida e realista".
"Para o BNG, calquera acordo orzamentario debe partir dunha premisa previa: o cumprimento do que xa estaba acordado", enfatizou Jorquera. Durante os últimos meses, o BNG e o PSOE mantiveron "reunións discretas" para facer seguimento dos acordos de investidura e orzamentos. "Nalgúns aspectos houbo avances, mais outros compromisos aínda están sen cumprir", concluíu.
A reunión de hoxe constitúe, por tanto, un paso inicial, pero o BNG espera que se cumpran as promesas e que se inicie un diálogo que realmente atenda as demandas da cidadanía e a situación dos barrios.