Comeza en Curtis a Ruta Destápate 2025 con propostas gastronómicas en 20 locais do municipio
O Concello de Curtis organiza esta fin de semana unha nova edición da Ruta Destápate, unha iniciativa gastronómica que contará coa participación de 20 locais de hostalaría de Curtis e Teixeiro. Dende hoxe ata o luns, 8 de decembro, os establecementos ofrecerán creacións especiais elaboradas cos dous produtos destacados do municipio: o queixo e a nabiza.
A ruta busca poñer en valor a gastronomía local, apoiar ao sector hostaleiro e dar a coñecer novos sabores aos veciños e visitantes. Os participantes poderán realizar un percorrido polos diferentes bares e restaurantes para probar tapas e pratos preparados especificamente para esta edición.
A Ruta Destápate 2025 celebrarase simultaneamente en Curtis e Teixeiro, converténdose nun punto de encontro para quen queira desfrutar da riqueza culinaria da comarca.