Coirós estrea o festival Coirock cunha noite de rock, jazz e ska no campo da festa
Coirós contará este Nadal cun novo encontro musical propio. Un grupo de veciñas e veciños do municipio impulsa o I Festival Coirock, unha cita que nace coa intención de consolidarse no calendario cultural local e ofrecer unha noite de música en directo no campo da festa de Coirós.
O festival celebrarase o sábado 20 de decembro a partir das 21.00 horas no recinto festivo, que é cuberto, polo que a organización garante a celebración do concerto con independencia da meteoroloxía. A proposta musical combina estilos como o rock, o jazz e o ska, cun cartel no que figuran as bandas 'Qando Vand' e 'La Piel del Oso', ademais da sesión posterior a cargo de 'DJ Residente Vil'.
A entrada ao I Coirock será totalmente gratuíta, polo que se presenta como unha opción de lecer accesible para toda a veciñanza e para o público da contorna. As persoas organizadoras agardan que esta primeira edición sexa o punto de partida dunha programación estable arredor da música en directo en Coirós, e convidan a todas as persoas afeccionadas aos concertos a achegarse ao campo da festa para gozar da estrea do festival.