Coirós arrinca en novembro o programa de compostaxe doméstica con repartos e formación
O Concello de Coirós pon en marcha este mes unha nova campaña de compostaxe doméstica co obxectivo de mellorar a xestión dos biorresiduos nos fogares e impulsar hábitos máis sostibles no municipio. As primeiras entregas de composteiros realizaranse o xoves 27 de novembro, con dúas quendas (11.00 e 20.30 horas) no Centro Social de Coirós. As persoas asistentes recibirán unha sesión formativa básica para comezar a compostar no seu fogar, así como indicacións prácticas para resolver dúbidas nas primeiras semanas.
A iniciativa está dirixida a veciños e veciñas con pequeno terreo, que poderán transformar os restos orgánicos en abono natural de alta calidade. O Concello facilitará un composteiro de balde, a formación inicial e acompañamento posterior para garantir unha correcta posta en marcha e o seguimento do proceso. Nas vindeiras semanas programaranse novas sesións noutros puntos do termo municipal, que se comunicarán polos canais oficiais.
Ademais de reducir a cantidade de lixo que chega ao colector, o programa promove a economía circular local: menos custos de xestión, menor pegada de carbono nos transportes e solos máis fértiles para hortas e xardíns. Na formación explicarase que materiais se poden empregar (restos vexetais de cociña, borras de café, cascas de ovo trituradas, herba e pequenas podas) e cales é mellor evitar para previr cheiros e pragas (carne, peixe, lácteos, aceites, cinzas tratadas), xunto con consellos sobre aireación, humidade e ubicación do composteiro.
A inscrición permanece aberta e toda a información actualízase en 'coiros.ocaminosostible.gal'. Tamén se pode solicitar por teléfono (647 521 464) ou por correo electrónico en 'info@ocaminosostible.gal'. Esta campaña conta co apoio da Xunta de Galicia e o financiamento do Plan de Recuperación, Transformación e Resiliencia (Next Generation EU) e enmárcase na aposta do Consorcio As Mariñas por un modelo de xestión sostible e de proximidade que implique directamente a cidadanía.