Coirós acolle a charla 'Educa bonito para a igualdade real' dirixida a familias e profesorado
O Centro de Información á Muller (CIM) de Coirós pon en marcha unha nova proposta formativa baixo o título 'Educa bonito para a igualdade real', unha charla vivencial que convida a reflexionar sobre como educar desde o afecto e, ao mesmo tempo, construír relacións igualitarias no fogar e no ámbito escolar. A actividade terá lugar o vindeiro 2 de decembro, en horario de 17.15 a 18.30 horas, en Coirós.
A sesión estará impartida por María Soto e está especialmente dirixida a familias, profesorado e persoas que acompañan a infancia no seu día a día. Ao longo do encontro ofreceranse ideas prácticas, recursos e novas miradas para fomentar unha crianza baseada no respecto, a corresponsabilidade e a igualdade, promovendo modelos educativos libres de estereotipos de xénero e de violencias.
A actividade conta con prazas limitadas, polo que é necesario inscribirse a través da páxina web municipal. Dende o CIM de Coirós anímase á veciñanza a participar e a sumarse a esta proposta, co obxectivo de avanzar cara a unha comunidade máis consciente, coidadora e igualitaria.