Cocido, música en directo e baile nun xantar popular que quenta motores en Vilarmaior
A Comisión de Festas de Vilarmaior xa ten data para unha das citas sociais do inverno. O sábado 7 de marzo de 2026 organizará un xantar (baile con cocido) no Pavillón Polideportivo a partir das 14.30 horas, cunha proposta pensada para xuntar mesa, festa e música en vivo.
O menú inclúe sopa de cocido e cocido completo, con produtos tradicionais como cacheira, lacón, costela, panceta e falda de tenreira galega, acompañados de patacas e grelos ou repolo segundo dispoñibilidade. A parte doce tamén terá protagonismo, con filloas artesás con rixóns e orellas, ademais de café con gotas e chupito de licores. En bebidas, haberá viño tinto e branco, augas e refrescos.
A xornada completarase con animación musical durante todo o día. A organización anuncia sesión vermú con Deluxe e tardeo con Álex, ademais dunha nova actuación de Deluxe para pechar a festa. Para garantir o confort no recinto, tamén se instalarán cañóns de calor.
O prezo para persoas adultas é de 35 euros, mentres que a cativada de 6 a 11 anos pagará 23 euros. As e os menores de 6 anos poderán asistir de balde. As reservas poden facerse nos teléfonos que figuran no cartel do evento.