Clausurada temporalmente parte do cemiterio de Cortiñán por falta de seguridade

O Concello de Bergondo demandara unha solución urxente para garantir a integridade das persoas

O Concello de Bergondo informa de que o Arzobispado de Santiago de Compostela decidiu clausurar temporalmente a zona dos panteóns do cemiterio de Cortiñán ante a falta de condicións de seguridade detectadas no recinto. A medida chega despois dos requirimentos realizados polo Concello, que instara a actuar de forma urxente para evitar riscos tanto para os visitantes como para os propios bens materiais.

Segundo traslada o Goberno municipal, o peche responde á necesidade de realizar unha avaliación técnica do estado dos panteóns afectados e determinar as medidas correctoras que garantan a súa estabilidade e a seguridade do conxunto. A decisión pretende previr posibles accidentes ou danos derivados do deterioro dalgunhas estruturas.