Churrasco, música e festa para animar marzo en Adragonte
A parroquia de Santiago de Adragonte, no concello de Paderne, converterase o sábado 28 de marzo nun punto de encontro para a música e a gastronomía coa celebración da Gran Churrascada de Areas, unha cita festiva pensada para reunir á veciñanza nunha xornada completa de lecer. O evento desenvolverase nun campo cuberto con carpa, unha fórmula coa que a organización busca garantir o ambiente de festa durante toda a xornada.
A programación arrancará ás 14.00 horas cunha sesión vermú amenizada por DJ Sebas21. A continuación celebrarase a churrascada, cun menú composto por churrasco, chourizo, pan, viño e sobremesa. Os tickets teñen un prezo de 16 euros en venda anticipada e de 18 euros o propio día da festa.
A música continuará desde as 18.00 horas coa sesión de tarde, na que subirán ao escenario a orquestra Los Satélites e, de novo, DJ Sebas21. A organización anunciou ademais un sorteo de 300 euros, engadindo un reclamo máis a unha convocatoria que mestura comida popular e verbena.
A festa está promovida pola Comisión Areas 2026 e conta coa colaboración do Concello de Paderne. As entradas poden adquirirse en 'O Noso Bar', en Areas, así como a través dos teléfonos habilitados pola organización para a venda anticipada e a reserva de mesas.