Celas de Peiro dá comezo ás festas de San Outelo cunha xornada de tradición e música
A parroquia de Culleredo, Celas de Peiro, iniciou as súas festas en honra a San Outelo cun programa cheo de actividades para todas as idades e gustos. Desde primeira hora da mañá, o disparo de bombas de palenque anunciou o comezo dunha xornada que combinou devoción, gastronomía e festa.
A misa solemne e a posterior procesión coa imaxe do santo congregaron a numerosos fieis que, un ano máis, quixeron render tributo a San Outelo. Ao mediodía, a sesión vermú animada pola orquestra Fuego deu paso a unha animada churrascada e pulpada, que converteron o campo da festa nun espazo de encontro e convivencia veciñal.
Xa pola tarde, os máis pequenos gozaron de xogos infantís antes de que a música volvese tomar protagonismo coa gran verbena, amenizada polo grupo Origen e a orquestra Fuego, encargados de poñer ritmo á primeira noite de celebración.
As festas continúan este domingo cunha programación igualmente completa. Haberá un novo disparo de bombas de palenque, a VI Andaina Canina e a X Feira de Artesanía. Celebrarase tamén a misa solemne, seguida dunha procesión e a tradicional bendición de cans.
O día estará cheo de actividades, incluíndo unha nova sesión vermú co grupo Unión y Fuerza, un sorteo de produtos ibéricos, exhibicións de esculpido con motosierra e de forxa, así como unha actividade informativa sobre o Can de Palleiro, raza autóctona galega. A festa pecharase cunha gran verbena a cargo, novamente, de Unión y Fuerza.