CCOO chama a concentrarse este xoves diante do Alcampo da Coruña contra a precariedade nos grandes almacéns
CCOO Servizos convoca este xoves, 18 de decembro, unha concentración diante do Alcampo da Coruña (Lugar Palavea, 1) para denunciar a precariedade laboral que, segundo o sindicato, soportan os cadros de persoal dos grandes centros comerciais en plena campaña de Nadal. A mobilización está fixada para as 12.00 horas e forma parte dunha convocatoria a nivel estatal en distintos establecementos do sector.
A organización sindical explica que a acción, bautizada simbolicamente como 'Nadal Vermello', pretende visibilizar un malestar que atribúe ao aumento das cargas de traballo, á falta de descanso e ás dificultades para conciliar. Segundo indica CCOO, unha enquisa interna realizada entre o 1 e o 8 de decembro recolle que practicamente a totalidade das persoas participantes di sufrir sobrecarga laboral e non dispor de recuperación suficiente tras as xornadas.
Entre as demandas que o sindicato pon enriba da mesa está que o traballo en domingos e festivos sexa voluntario e leve unha compensación económica, unha medida que, sinalan, conta cun amplo respaldo do persoal e que CCOO di querer defender nas negociacións coas empresas e coa patronal ANGED.
No caso de Galicia, CCOO engade que o malestar medrou tras a decisión da Xunta de permitir aperturas en dúas datas que afectan ao descanso estival do sector (o 26 de xullo e o 15 de agosto). A federación anuncia, ademais, que convocará xornadas de folga eses dous días como protesta pola sobrecarga e pola dificultade para conciliar.
Xunto á convocatoria da Coruña, o sindicato reclama tamén reforzos de persoal nos picos de vendas, salarios “dignos e xustos”, incentivos reais, máis descanso e respecto polo calendario laboral, ademais de cobertura de baixas e medidas para protexer a saúde física e mental.