Catro detidos nunha operación antidroga en Sada e Bergondo
A Garda Civil detivo a catro persoas no marco dun operativo contra o tráfico de drogas desarrollado nos concellos de Sada e Bergondo. Os axentes realizaron entradas e rexistros en varias vivendas, entre elas inmobles situados nas rúas Párroco Villanueva e Sadadarea, en Sada, e na zona de Gandarío, en Bergondo.
O caso continúa aberto e o xulgado decretou o segredo de sumario, polo que por agora non transcenderon nin o tipo de substancia intervida nin a cantidade incautada durante os rexistros.
Esta actuación produciuse un día despois doutra operación de maior alcance desenvolvida en distintos puntos de Galicia, coordinada de forma conxunta por Garda Civil e Policía Nacional (coa participación de Vixilancia Aduaneira), con detencións na cidade da Coruña, Arteixo, Ferrol e tamén na provincia de Pontevedra. Nese procedemento, a maxistrada da Sección de Instrución do Tribunal de Instancia da Coruña (praza 6) decretou prisión provisional, comunicada e sen fianza para tres dos arrestados que pasaron a disposición xudicial na Coruña, mentres que noutros casos as dilixencias seguían en marcha.
A Garda Civil mantén a investigación con discreción e non confirmou se os rexistros realizados en Sada e Bergondo gardan relación directa con ese operativo previo.
As actuacións policiais desta semana en Sada chegan, ademais, poucos días despois doutra intervención allea ao narcotráfico: a chamada operación 'Forcarei', na que a Garda Civil detivo catro persoas (unha delas menor) ás que se lles atribúen arredor de trinta roubos mediante o método do alunizaxe en A Coruña, Lugo e Asturias.