Carreira da Muller na Coruña: máis de 8.000 participantes e 6,3 km polo paseo marítimo
A Carreira da Muller reunirá este domingo 28 de setembro na Coruña a máis de 8.000 persoas nun percorrido de 6,3 km que partirá de Riazor e chegará ata a Torre de Hércules polo paseo marítimo. A alcaldesa, Inés Rey, presentou a cita deportiva e solidaria acompañada pola concelleira de Benestar Social, Igualdade e Participación, Nereida Canosa, e polo concelleiro de Deportes, Manuel Vázquez.
“Un ano máis, a cidade tinguirase de rosa para apoiar a loita contra o cancro, impulsar a investigación preventiva e reivindicar os dereitos das mulleres con discapacidade”, destacou Rey. Nesta edición, a carreira homenaxea a asociación ‘A Ciencia é feminino’ —o programa de CUAC FM que visibiliza científicas galegas e que impulsa o proxecto #MásQueUnaMuñeca— e á deportista coruñesa Julia Benedetti, olímpica en skateboarding en Tokyo e París, que recibirá un recoñecemento especial antes da saída.
A vertente solidaria reforzase con 50 dorsais integramente benéficos para ACADAR (Asociación de Mulleres con Discapacidade de Galicia), coa que a organización colabora desde hai anos. Ademais, na sección +SolidariAs visibilizarase o labor de Bolboretas Coruña Dragon Boat, asociación composta por mulleres que superaron ou están en tratamento por cancro de mama, que empregan o deporte para mellorar secuelas físicas e emocionais.
Todas as participantes lucirán o dorsal 016, o teléfono de atención ás vítimas de violencia machista, como mensaxe de concienciación e rexeitamento da violencia de xénero. Ao remate do circuíto, realizarase unha achega de 90.000 € á Asociación Española Contra o Cancro (AECC) e doazóns de 1.000 € a Wanawake Muller, á Fundación GEICAM (investigación en cancro de mama) e á Asociación Clara Campoamor (defensa dos dereitos das mulleres).