Carral pecha o exercicio de 2024 cun remanente superior a 1,6 millóns de euros
O Concello de Carral vén de concluír a liquidación do orzamento correspondente ao ano 2024 cun balance claramente positivo. Segundo informou o alcalde, Javier Gestal, durante o pleno ordinario, o remanente de tesourería para gastos xerais ascende a 1.602.929,71 euros. Esta cifra, sinalou o rexedor, permitirá “continuar incrementando os servizos e para executar novos investimentos para a veciñanza”.
O Goberno local convocará proximamente aos portavoces dos distintos grupos da corporación municipal para consensuar os proxectos e actuacións que se financiarán con estes fondos.
Ademais do remanente, outro dato salientable da liquidación é o nivel de débeda formalizada, que se sitúa no 10,30 % con respecto aos ingresos, moi por debaixo do límite legal e herdado do anterior executivo do Partido Popular.
Tamén destaca a mellora na xestión dos pagos aos provedores. Ao longo de todo o ano 2024, o período medio de pagamento (PMP) estivo sempre por baixo dos 30 días, o máximo permitido pola normativa vixente.
No pleno tamén se fixo público o informe do PMP correspondente ao primeiro trimestre de 2025. Segundo o documento elaborado pola interventora municipal, entre xaneiro e marzo deste ano o Concello efectuou os pagos aos seus provedores nun prazo medio de 6,53 días. Gestal lembrou que “a baixada dos prazos de pagamentos foi un dos obxectivos que nos marcamos desde que entramos no Concello e, pouco a pouco, fomos reducindo os tempos”.
De feito, no primeiro trimestre de 2019, o Concello tardaba 48,8 días de media en pagar. Dende entón, agás en 2020 e 2021, anos marcados pola pandemia da COVID-19, o indicador mantívose sempre por debaixo do límite legal. Así, no primeiro trimestre de 2022 foi de 6,14 días; no de 2023, de 15,82; no de 2024, de 6,98; e este ano quedou en 6,53 días.
O pleno tamén serviu para oficializar a entrada de Nerea Álvarez Pérez como nova concelleira do grupo de Alternativa dos Veciños de Carral. A edil toma posesión en substitución de Susana Guimarey García, que presentara a súa renuncia no pasado mes de marzo.