Carral leva a pleno a construción dunha pista multideporte en San Vicente de Vigo
O Concello de Carral celebra o luns 22 de decembro, un pleno extraordinario no que se debaterá a proposta de investimentos a financiar co POS+Adicional da Deputación da Coruña. Entre as actuacións incluídas figura a construción dunha pista multideporte en San Vicente de Vigo, unha intervención coa que o goberno local pretende atender unha demanda histórica da veciñanza ao tratarse da única parroquia do municipio que carece dunha instalación destas características.
Segundo o proxecto, a pista executarase nunha parcela próxima á igrexa de San Vicente de Vigo, un terreo cedido no ano 2019 tras un convenio co Arcebispado de Santiago. A actuación conta cun orzamento base de licitación de 125.358,70 euros e contempla movementos de terra, traballos de cimentación, a construción de muros de contención, pavimentación e a instalación de iluminación, peches e porterías para deixala operativa.
A futura pista encaixa na folla de ruta municipal para completar ese espazo, onde xa se proxectou a creación dun aparcadoiro e unha zona verde de uso recreativo, concibida tamén para acoller eventos e festas pola amplitude da parcela.