Carral despedirá o ano cunha gran festa na carpa do Campo da Feira na madrugada do 1 de xaneiro
O Concello de Carral quere que a benvida a 2026 se viva na casa. Baixo o lema #QuedaEnCarral, o municipio prepara a súa Noite de Fin de Ano cunha proposta musical na carpa do Campo da Feira, pensada para alongar a celebración tras as badaladas e converter a madrugada do xoves 1 de xaneiro nun punto de encontro para a veciñanza.
Segundo a información difundida polo Concello, a festa arrancará coa música en directo de Eric Hidalgo e ‘4 en línea’, que subirán ao escenario a partir das 1.30 horas. A continuación, o programa continuará coa actuación de ‘Dream Team’, prevista desde as 3.45 horas, nunha noite que aspira a manter o ambiente festivo ata ben entrada a madrugada.
Desde o Concello animan á participación e lembran que se trata dun dos plans centrais destas datas no municipio, coa carpa do Campo da Feira como escenario dunha cita que busca poñer a banda sonora ao primeiro día de 2026.