Carral avanza nas xestións para construír un novo centro de saúde
O Concello de Carral mantén abertas as conversas coa Consellería de Sanidade para impulsar o proxecto dun novo centro de saúde no municipio. Nesta liña, o alcalde, José Luis Fernández Mouriño, recibiu esta semana ao xerente da Área Sanitaria da Coruña e Cee, Luis Verde, acompañado de dous técnicos da Consellería, co fin de coñecer sobre o terreo o estado actual das instalacións sanitarias.
Durante o encontro, as partes analizaron os principais problemas que presenta o edificio actual, con especial atención ás humidades, á sensación térmica no interior e ao estado das ventás. Tras a reunión, o xerente e o persoal técnico realizaron unha inspección do inmoble, na que tomaron nota dos desperfectos detectados.
As filtracións de auga son, segundo o Concello, un dos danos máis relevantes, xa que en períodos de mal tempo e choivas aparecen de forma continuada. Outra das cuestións abordadas foi a dificultade para manter unha temperatura adecuada no interior, un aspecto que os técnicos puideron comprobar durante a visita. O deterioro do revestimento exterior estaría a provocar perdas de calor e, por extensión, unha menor eficiencia.
Entre as posibles solucións mencionadas figura a substitución das ventás por outras con maior capacidade de illamento, ademais doutras medidas de mellora do confort térmico do centro. Estas cuestións forman parte da análise previa mentres se avanza na planificación dun novo equipamento sanitario.
Fernández Mouriño agradeceu a implicación da Xunta por atender 'con tanta rapidez' unha das principais demandas do municipio e vinculou a necesidade da actuación ao crecemento poboacional. O rexedor destacou que Carral está preto de acadar os 7.000 habitantes e insistiu en que contar con servizos públicos de calidade resulta clave para que o concello siga a ser unha opción atractiva para vivir.