Carral arrinca este xoves as obras para arranxar a vía de Balbén, en San Vicente de Vigo
O Concello de Carral iniciará este xoves, 22 de xaneiro, os traballos de mellora da vía de Balbén, na parroquia de San Vicente de Vigo. A intervención chega despois de que, na zona, se executasen actuacións vinculadas ao saneamento que, co paso do tempo, acabaron por afectar o estado do firme, deixando a estrada en condicións deficientes e xerando queixas entre a veciñanza.
Co novo proxecto municipal, o obxectivo é corrixir esas deficiencias e recuperar un pavimento en bo estado, mellorando tanto a seguridade como o confort da circulación neste punto. Desde o Concello lembran que, mentres duren as obras, haberá movemento de maquinaria e labores na propia calzada, polo que solicitan circular con precaución e atender á sinalización que se poida habilitar.
A administración local pide desculpas polas molestias que poidan producirse durante a execución dos traballos e apela á colaboración da cidadanía para facilitar o desenvolvemento da actuación.