Carral aproba o Plan Único de Obras cun investimento de máis de 1,1 millóns de euros
O Concello de Carral garantirá a execución de novas infraestruturas tras a aprobación unánime do Plan Único de Obras da Deputación. O alcalde, Javier Gestal, logrou o apoio de todos os grupos municipais despois de manter reunións coa corporación, defendendo a necesidade de investir estes fondos en actuacións clave para o municipio.
O acordo permitirá dispoñer de 1.107.658,13 euros, que se destinarán á execución do saneamento en Gosende, a mellora de vías e gabias en Vista Real, a renovación da capa de rodadura na estrada que conecta Cimadevila con Montecelo, así como na rúa da Fraga, onde tamén se formarán gabias de formigón. Tamén se inclúe a mellora da capa de rodadura na estrada de Montecelo ao lugar da Poza.
O rexedor celebrou que o Concello e a veciñanza poidan beneficiarse destes fondos provinciais e advertiu de que sería unha irresponsabilidade perder esta axuda por falta de consenso. Con todo, lamentou que quedasen fóra intervencións que o goberno local consideraba prioritarias, como a instalación do saneamento na parroquia de Cañás. Explicou que se trata dunha obra fundamental e moi demandada, pero que non foi posible incluíla por falta de acordo.
Tamén quedaron excluídas outras actuacións propostas inicialmente polo executivo municipal, como a humanización da rúa Souto, a mellora da iluminación entre Sergude e Cañás e a instalación de iluminación LED no lugar de Pedreiro.
Ademais, o pleno deu luz verde ao Plan Complementario da Deputación para 2025, que contará cunha achega de 168.991,56 euros destinada á mellora da salubridade da envolvente do pavillón polideportivo municipal de O Espiño.