Carral activa un plan especial para desbloquear a ampliación do pavillón de O Espiño
O Concello de Carral iniciou a tramitación dun Plan Especial de Infraestruturas e Dotacións (PEID) para facer posible a ampliación do pavillón de O Espiño. O alcalde, José Luis Fernández Mouriño, defende que se trata dun paso ‘necesario’ para executar unha intervención que considera ‘esencial’ co fin de aumentar os usos dunha instalación cunha elevada demanda ao longo de todo o ano.
Segundo explicou o rexedor, a actuación fora presentada á convocatoria do Plan Único (POS+) da Deputación cando gobernaba Alternativa dos Veciños, pero a solicitude foi rexeitada ao non dispoñer dos terreos precisos para ampliar e ao existir limitacións urbanísticas. O informe do arquitecto municipal advertía de que a zona na que se pretendía actuar estaba clasificada como solo rústico e suxeita ao réxime de fóra de ordenación, o que impedía ampliar a edificación sen unha ferramenta de planeamento específica como o PEID. A denegación chegou o 26 de setembro, conforme ao relatado polo goberno local.
O Concello sostén que esta situación obrigou a reformular os investimentos vinculados ao POS+ Adicional para evitar a perda de fondos provinciais e que, tal e como se acordou no pleno de novembro, a achega se destinará finalmente a outras actuacións: a humanización dunha parcela en San Vicente, melloras no CEIP de Tabeaio (substitución de carpintaría exterior e acondicionamento interior) e a renovación de beirarrúas en Sobrepiñeiro ata o límite con Culleredo.
En paralelo, a ampliación do polideportivo queda encamiñada a través da redacción do PEID, para a que o Concello xa contratou un proxecto. O obxectivo, apunta o goberno municipal, é redelimitar o solo urbano neste ámbito e despexar o camiño para dispoñer das parcelas necesarias.
O proxecto presentado á Deputación contemplaba, entre outras melloras, gañar superficie útil cun volume anexo duns 218 metros cadrados para crear unha nova bancada e sumar arredor de 200 prazas adicionais, ademais de corrixir problemas de filtracións e renovar a iluminación con tecnoloxía LED.