Cambre pide convocar de urxencia o Consello Escolar Municipal tras denunciar falta de apoios no CEIP de Sigrás e problemas de transporte no IES Alfonso X
O grupo impulsor reclamou na Xunta de Goberno de Cambre a convocatoria urxente do Consello Escolar Municipal (CEMC) para dar resposta ás carencias de apoio educativo e ás incidencias de transporte detectadas neste inicio de curso. O executivo local mostrou interese pola proposta e abriu a porta a unha posible convocatoria do órgano, que non se reúne desde hai dous anos malia integrar profesorado, familias, alumnado e sindicatos.
O CEIP Gonzalo Torrente Ballester (Sigrás) dispón de unha docente de Pedagoxía Terapéutica (PT) e media xornada de Audición e Linguaxe (AL) —compartida co CEIP Emilio González López—, unha dotación cualificada de insuficiente polas familias para garantir a inclusión e o apoio personalizado. A convocatoria do CEMC permitiría tamén tratar as problemáticas de transporte que padece a diario o alumnado do IES Alfonso X O Sabio, así como priorizar necesidades comúns de centros, ANPAS e comunidade educativa.
As entidades promotoras lembran que o CEMC é unha ferramenta de participación real para traballar conxuntamente e impulsar iniciativas colectivas perante as administracións competentes. A súa reactivación serviría para calendarizar medidas, seguir compromisos e canalizar demandas que melloren a equidade e a calidade educativa en Cambre.