Cambre impulsa unha campaña solidaria de Nadal para reforzar a Despensa Municipal de alimentos
O Concello de Cambre, en colaboración co Clube Ciclista Cambre, vén de poñer en marcha unha nova campaña solidaria de Nadal centrada na recollida de alimentos para abastecer a Despensa Municipal, un servizo esencial que ofrece apoio ás familias do municipio que atravesan unha situación de vulnerabilidade social.
A iniciativa estará activa do 9 ao 15 de decembro e permitirá achegar produtos de primeira necesidade como conservas (atún, sardiñas...), leite, aceite e alimentos típicos do Nadal. As doazóns poderán entregarse na Despensa Municipal, situada na praza Amador e Daniel número 24, en horario de 9.30 a 14.00 horas de luns a venres.
Desde o Concello destacan que a demanda de axuda alimentaria continúa en aumento e que accións como esta resultan fundamentais para garantir que todas as familias poidan afrontar estas datas con maior tranquilidade. A Despensa Municipal distribúe produtos básicos entre os fogares que máis o precisan, adaptando os lotes ás necesidades de cada unidade familiar e coordinándose cos servizos sociais municipais.
O Clube Ciclista Cambre, implicado activamente na iniciativa, chama á participación veciñal e anima a aproveitar estes días para realizar achegas que contribúan a construír un Nadal máis solidario e igualitario. 'Entre toda a comunidade podemos facer que ningunha familia quede atrás', sinalan.
O Concello agradece a colaboración do tecido asociativo e lembra que esta campaña compleméntase con outras accións sociais previstas para o Nadal, co obxectivo de reforzar a protección das persoas máis vulnerables do municipio.