Cambre impulsa un Campamento Dixital para promover o uso seguro de internet
A OMIX de Cambre organiza, en colaboración coa Fundación Cibervoluntarios, un Campamento Dixital dirixido á mocidade de 14 a 17 anos, que se celebrará en Semana Santa entre o 14 e o 16 de abril. O obxectivo desta iniciativa é fomentar un uso seguro e responsable da tecnoloxía, abordando temas como a protección de datos persoais, a privacidade, a busca de información fiable, o ciberacoso e a xestión do tempo en redes sociais.
O programa, que terá lugar en Casa Arrigada de 10.00 a 13.00 horas, aposta por un enfoque dinámico e entretido, onde os participantes aprenderán a xestionar mellor o seu tempo en internet, protexer a súa identidade dixital e descubrir ferramentas dixitais útiles para o seu futuro profesional.
Durante as sesións, recibirán pautas para filtrar e seleccionar información en internet, coñecerán estratexias para a busca de emprego a través das TIC e aprenderán a crear contrasinais seguras para protexer os seus datos persoais. As inscricións xa están abertas e poden realizarse a través do formulario online dispoñible na web municipal.