Cambre destinará máis de 153.000 euros ao mantemento de marquesiñas e postes
O Concello de Cambre aposta polo transporte público e a mellora do seu mobiliario urbano coa licitación dun novo contrato para o mantemento de marquesiñas e postes de parada de autobús. Cun orzamento inicial de 153.231,25 euros e unha duración de dous anos, esta actuación inclúe a reparación e conservación de 100 marquesiñas e 74 postes de información en todas as parroquias do municipio.
O reparto das marquesiñas contempla 17 en Cecebre e Anceis, 11 en Cambre e Sigrás, 10 en O Temple, 8 en Bribes e Brexo-Lema, 4 en Santa María de Vigo e Pravio, e 3 en San Lourenzo de Meixigo, Cela e Andeiro. O contrato tamén inclúe calquera infraestrutura adicional que se instale durante a súa duración.
Os traballos dividiranse en dúas fases:
- Primeira fase: Durante os tres primeiros meses acometerase unha reparación integral do mobiliario urbano, que se atopa nun estado deteriorado.
- Segunda fase: A partir de entón, iniciarase o mantemento regular, que inclúe reposición de elementos danados, limpeza e desbroce de vexetación, garantindo un bo estado ata finais de 2026.
A alcaldesa, María Pan, agradeceu o apoio de Alternativa dos Veciños para sacar adiante a licitación, ao tempo que destacou a necesidade de reforzar o departamento de contratación do Concello. A rexedora fixo fincapé na importancia de contar cun técnico superior A1 en Contratación, o que permitiría acelerar e mellorar os procesos administrativos.
“Cambre necesita avanzar e licitar servizos e obras de maneira áxil. O interese xeral do Concello debe estar por riba de calquera outra consideración”, subliñou Pan.