Cambre abre o prazo de inscrición na Escola de Actividades Físicas e Saúde 2026
O Concello de Cambre abrirá este martes, 9 de decembro, o prazo de inscrición para participar na Escola de Actividades Físicas e Saúde 2026, un programa deportivo e de benestar orientado á poboación en xeral, con especial atención ás persoas maiores. A iniciativa busca fomentar a práctica regular de exercicio e a adopción de rutinas saudables ao longo de todo o ano.
A programación desenvolverase de xaneiro a decembro de 2026, facendo unha pausa nos meses de xullo e agosto, e inclúe propostas como ioga, taichi, sesións de relaxación, ximnasia de mantemento e actividades específicas deseñadas para a terceira idade, combinando traballo físico suave con exercicios de mobilidade e equilibrio.
As persoas interesadas poderán inscribirse do 9 ao 18 de decembro, tanto nas oficinas de rexistro municipais como a través da sede electrónica do Concello. No caso de que o número de solicitudes supere o de prazas dispoñibles, o goberno local realizará un sorteo público o 22 de decembro para adxudicar as prazas. As listas provisional e definitiva de persoas admitidas publicaranse o 23 de decembro e o 8 de xaneiro, respectivamente.
As actividades que consigan o mínimo de alumnado requirido arrincarán o 12 de xaneiro de 2026 e impartiranse en diferentes centros municipais, co obxectivo de achegar a oferta deportiva aos distintos núcleos de poboación de Cambre e facilitar a participación da veciñanza. Desde o Concello lembran que toda a información ampliada está dispoñible na páxina web municipal e animan á cidadanía a aproveitar esta oportunidade para manterse activa durante todo o ano.