Cambios de circulación en Riovao como paso previo á obra de humanización dun tramo da DP-7509
O Concello de Sada anuncia unha serie de cambios na circulación do tráfico rodado no Camiño de Riovao como paso previo á execución do proxecto de mellora da mobilidade e seguridade viaria na zona. Estes cambios serán efectivos ao longo deste mes de abril.
A administración local publica un bando informando á veciñanza das novas medidas, entre as que se establece un sentido único de circulación no Camiño de Riovao (estrada DP-7509) entre A Chaburra e o cruce das estradas DP-7509 e DP-7503, preto do lavadoiro de Beloi. Como consecuencia, quedará prohibido o acceso ao Camiño de Riovao desde este cruce.
Dende o Concello de Sada agradécese a colaboración da veciñanza e antecípanse desculpas polas molestias ocasionadas, subliñando que estes cambios redundarán nunha mellora da seguridade viaria no núcleo de Riovao.
Estes cambios na circulación forman parte dos traballos previos á obra de humanización da vía. O proxecto contempla a creación dunha plataforma única que permitirá a ampliación das beirarrúoas e a mellora do firme, co obxectivo de optimizar a mobilidade peonil, reordenar o tráfico e habilitar zonas específicas de aparcamento para vehículos.
A execución deste proxecto contará cun investimento de 665.000 euros, financiados conxuntamente polo Concello de Sada e a Deputación da Coruña.