Boa acollida en Irixoa ao encontro literario sobre feminismo celebrado na Biblioteca Municipal
A Biblioteca Municipal de Irixoa acolleu un encontro literario centrado na reflexión sobre o feminismo a través da literatura, unha proposta que contou cunha boa acollida por parte da veciñanza.
A actividade, titulada 'Perspectivas literarias: As Letras moradas. Un achegamento literario sobre o feminismo', reuniu ás escritoras Lydia Chas e María Nieto nunha sesión aberta ao público na que se abordaron diferentes visións e experiencias arredor da literatura escrita por mulleres e do papel do feminismo no ámbito cultural.
Durante o encontro, as autoras compartiron co público as súas reflexións sobre a creación literaria, a evolución da presenza feminina no mundo editorial e a importancia da literatura como ferramenta para visibilizar realidades e promover a igualdade.
A iniciativa formou parte da programación cultural promovida pola Biblioteca Provincial da Deputación da Coruña e contou coa colaboración do Concello de Irixoa, que destacou a participación e o interese xerado entre as persoas asistentes.
Este tipo de encontros buscan achegar a literatura á cidadanía e crear espazos de diálogo arredor de temas de actualidade, fomentando ademais o contacto directo entre autores e lectores no ámbito local.