BioCultura volta a ExpoCoruña do 6 ao 8 de marzo con máis de 150 expositores e un salto cara ao ecoturismo profesional
ExpoCoruña acollerá do 6 ao 8 de marzo o regreso de BioCultura, a cita centrada no consumo responsable e nos produtos ecolóxicos que cada ano reúne marcas, proxectos e público interesado en alimentación ‘bio’, cosmética natural, moda sostible, saúde e benestar, artesanía e entidades sociais. A organización prevé máis de 150 expositores e unha programación paralela con charlas, obradoiros e actividades ao longo das tres xornadas.
A principal novidade desta edición é o reforzo do ecoturismo, que deixa de ser un apartado secundario para gañar peso dentro da feira. O programa inclúe accións pensadas para profesionais do sector, como un encontro de traballo entre propostas de ecoturismo e turoperadores, ademais dunha xornada previa (5 de marzo) con visitas a distintos puntos da Coruña e da contorna da Reserva da Biosfera Mariñas Coruñesas.
BioCultura tamén incorporará contidos divulgativos ligados á actualidade, como unha ponencia sobre o eclipse do 12 de agosto, e volverá contar cun espazo destacado para o Festival Yoga Noroeste dentro do propio recinto feiral.
En canto ao público xeral, a feira abrirá de 11.00 a 20.00 horas o venres e o sábado, e de 11.00 a 18.00 horas o domingo. A entrada xeral custa 4 euros, con pase de tres días por 8 euros (só en venda en liña), e hai acceso gratuíto para nenos e nenas até 12 anos.