Betanzos prepárase para a Papanoelada Ciclista o 22 de decembro
O domingo, 22 de decembro, Betanzos acollerá unha nova edición da Papanoelada Ciclista, unha divertida iniciativa para celebrar o Nadal sobre dúas rodas. A actividade está organizada polo Club BTT Caimanes Betanzos en colaboración co Concello de Betanzos e a Deputación da Coruña.
A saída terá lugar ás 18:00 horas desde a praza Irmáns García Naveira, e o percorrido levará aos participantes polas principais rúas da vila, gozando do ambiente festivo propio destas datas. Para participar, é imprescindible levar bicicleta, así como casco e elementos reflectantes que garantan a seguridade durante o traxecto.
Esta iniciativa convida a todos os veciños e visitantes a compartir o espírito do Nadal dunha maneira orixinal e deportiva, mentres se promove o uso da bicicleta e hábitos saudables.
O Club BTT Caimanes anima a toda a cidadanía a sumarse á actividade e a converter a Papanoelada Ciclista nunha gran celebración comunitaria.