Betanzos inicia na rúa do Rollo un plan para mellorar a seguridade viaria en beirarrúas e pasos de peóns
O Concello de Betanzos comezou na rúa do Rollo un programa de actuacións destinadas a incrementar a seguridade viaria nas rúas da zona urbana. Segundo explicou a alcaldesa, María Barral, os traballos inclúen a creación de pasos de peóns elevados que actuarán tamén como badéns para limitar a velocidade do tráfico, así como a mellora dos pasos xa existentes co obxectivo de facelos máis accesibles para as persoas con mobilidade reducida na medida do posible.
O plan abrangue intervencións en varias rúas da cidade que, segundo indicou Barral, precisaban dun acondicionamento tanto en materia de accesibilidade como de seguridade viaria. Por este motivo, encargouse un proxecto que contempla non só os pasos de peóns, senón tamén as beirarrúas e accesos contiguos, para adaptalos e evitar barreiras arquitectónicas. Ademais, nalgúns puntos tamén se renovará o aglomerado para mellorar a evacuación de augas e evitar acumulacións.
As rúas nas que se levarán a cabo estas melloras son o Paseo do Malecón (N-651), a rúa Ribeira, Valdoncel, Alfolí, a praza Alfonso X, Poeta Manuel María, a propia rúa do Rollo e o Camiño Cal das Barras. Precisamente, na rúa do Rollo iniciáronse xa os traballos, que inclúen a pavimentación completa da vía, limpeza de cunetas e arcenes, fresado da capa de rodaxe para mellorar a adherencia por mor da pendente existente, colocación de novo firme, sinalización vertical e pintado de marcas viarias. Tamén se actuará sobre as beirarrúas, especialmente na contorna do número 68 da mesma rúa.
Como parte das medidas previstas, na rúa do Rollo instalarase un paso de peóns elevado que tamén funcionará como badén, ademais dun “lombo de burro” a metade da rúa. Outro elemento similar será colocado na rúa Cal das Barras, co mesmo obxectivo de reducir a velocidade do tráfico e mellorar a seguridade dos peóns.