Betanzos e comarca impulsan o sector agrogandeiro coa Cooperativa El Plantel: novos servizos, maquinaria e dixitalización
A Cooperativa El Plantel Comarcal de Betanzos, fundada en 1974 e que hoxe integra seis cooperativas e cerca de 200 socios, acelera a modernización do tecido agrogandeiro da comarca cun paquete de melloras que reforzan a competitividade, a seguridade e a sostibilidade das explotacións.
O catálogo de servizos —control da calidade do leite, carro de mestura alimentaria, asesoramento con nutrólogos, servizos de abonadoras e sulfatadoras, analíticas de solos e tenda agraria e de horta— amplíase coa recente compra dun carro mesturador autopropulsado, que facilita a alimentación do gando, reduce tempos, consumo e emisións e mellora a seguridade no manexo.
Nos últimos tres anos, El Plantel canalizou máis de 223.000 € en investimentos para a comarca. En 2025 recibiu case 97.000 € na liña de maquinaria de uso compartido (CUMA), clave para racionalizar custos, introducir novas tecnoloxías e aforrar enerxía. Ademais, a cooperativa sumou 96.000 € noutros proxectos de transformación e comercialización: cuberta da nave de pensos, instalación de silos e automatización da fábrica, melloras que reducen perdas, profesionalizan a loxística e incrementan a calidade do produto final.
A aposta pola dixitalización e pola eficiencia enerxética reforzouse este ano co Bono Consolida Economía Social (30.000 €), que permite investir en equipo informático, software, márketing, formación e melloras de instalacións ata o 31 de outubro de 2025. Todo isto tradúcese en máis servizo, máis valor engadido e emprego de calidade para Betanzos e a súa área.
De cara ao curto prazo, El Plantel anima as explotacións socias a aproveitar a nova liña plurianual para instalacións e equipamentos en común —orientada á adaptación e mitigación do cambio climático—, con prazo aberto ata o 8 de outubro e cofinanciación que pode acadar o 65% (ata un máximo de 3 millóns € por proxecto). Son elixibles actuacións que melloren o rendemento, a viabilidade e o benestar animal, a eficiencia no uso da auga, do solo e do aire, a bioseguridade e a redución da dependencia química.