Betanzos baila por unha causa solidaria coa 'Xornada solidaria de Brigodanza'
A danza e a solidariedade xúntanse este sábado, 17 de xaneiro, en Betanzos coa celebración da 'Xornada solidaria de Brigodanza', unha iniciativa que destinará a recadación á Cruz Vermella Betanzos.
A cita terá lugar no Edificio Liceo e desenvolverase en dous pases, o primeiro ás 18.00 e o segundo ás 19.30 horas. A asistencia estará limitada a persoas con invitación, segundo a organización. Como entrada, as persoas asistentes deberán achegar unha doazón de produtos de hixiene persoal ou doméstica, ademais de alimentos non perecedoiros, que se canalizarán a través da Cruz Vermella na cidade.
No apartado artístico participarán a Escuela de Baile SalsaNova, Crossbody de Culleredo e Tropicalia escuela de baile en Arteixo, que porán o ritmo a unha tarde pensada para colaborar e sumar axuda a quen máis o precisa.